प्रहरीले नै पोष्टमार्टमको गलत रिपोर्ट बनाउने गरेकाे खुलासा

काठमाडौ– प्रहरीले हत्याका घटनामा आर्थिक प्रलोभनमा परेर पोष्टमार्टमको गलत रिपोर्ट बनाउने गरेको संसदीय समितिको अनुसन्धानबाट खुलेको छ ।

व्यवस्थापिका संसद्को सामाजिक न्याय तथा मानवअधिकार समिति अन्र्तगतको उपसमितिले काभ्रेको पाँचखालका अजित मिजारको रहस्यमय मृत्युका सम्बन्धमा अध्ययनका क्रममा प्रहरीले पोष्टमार्टमको गलत रिपोर्ट बनाउने गरेको खुलेको हो ।

काभ्रेको ज्याम्दीकी पराजुली थरकी १७ वर्षिय युवतीसँग प्रेम विवाह गरेका पाँचखालका १८ वर्षिय अजित गत असार २९ गते घरबाट हराएकोमा असार ३० गते धादिङको गजुरी खोलामा उनको शव फेला परेको थियो ।

उपसमितिकी संयोजक कमला दोङले समितिको शुक्रबारको बैठकमा गजुरी प्रहरी र गजुरी स्वास्थ्य चौकीले युवतीको परिवारको प्रलोभनमा परेर शव नै नचिरी अजितले आत्महत्या गरेको भनेर पोष्टमार्टमको झुटो रिपोर्ट बनाएको प्रमाण फेला परेको बताए ।

उपसमितिका सदस्यहरुले अजितको हत्याका सम्बन्धमा छानविनका क्रममा धादिङ र काभ्रेका प्रहरीले असहयोग गरेको समेत बताएका छन् ।

उपसमितिका सदस्य खड्गबहादुर बस्यालले प्राप्त प्रमाणहरुबाट अजितको हत्या भएको देखिएको र यस सम्बन्धमा काभ्रेको पाँचखालका प्रहरीसँग केरकार गर्दा असई जवाफ दिन नसकेर असिनपसिन भइ कामेको बताए । पाँच सदस्यीय उपसमितिले प्रतिवेदन तयार पार्न बाँकि छ ।